【電影吹水潭】

超級英雄電影冇超能力，所以事前好多人都吹奏佢係占士邦式電影。喺...

【電影吹水潭】

超級英雄電影冇超能力，所以事前好多人都吹奏佢係占士邦式電影。喺戲入面Black Widow 直頭有自己避世睇007嘅情節，可以話「致敬」到出面。但係好可惜，呢套Black Widow 單飛電影，只係一套非常之普通嘅動作片。無輪係鬧市嘅追車場面、兩三場格鬥、雪山逃獄、抑或係高潮戲大破天空城，都係由一堆毫不驚喜嘅動作場面堆砌而成，無任何新鮮感可言。壞人嘅驚天大陰謀、007嘅高科技支援、調查途中嘅局中局、上天下海嘅大場面，呢啲007特色喺Black Widow 都可以話有出現到，但係無一樣係突破到舊有睇開嘅動作片（除咗007， 仲有M:I 系列等）。喺MCU不斷發展出自己嘅Signature底下，今次只有抄而無丁點創新係令人跌眼鏡嘅。

故事方面，作為MCU Phase 4頭炮，套戲係可有可無。你可以話佢係用黎舖之後嘅主力White Widow，又可以話係畀Scarlett Johansson 最後一次以Black Widow 身份見觀眾嘅機會（有傳話佢有興趣以另一身份登場），但係有跟開MCU，就知前者要搵個新角色出場有大把方法；後者原因就真係好粉絲向嘅決定，不過以今次套戲嘅質素黎講，就有愧於個角色喇。套戲講Black Widow 身世，講佢嘅「家庭」，最多發展空間係佢地四人嘅相處，但係好可惜，場口唔多之餘，每場戲都好悶下（去到阿媽間屋之後，大家講嘅對白去到每個演員嘅動作，都係唔好睇嘅）。成家人明明各有各理念想法，但走埋一齊無乜（好笑或認真）嘅衝突，有嘅話都係來去匆匆，話嬲就嬲，話和解就和解。明明有個負責搞笑，有個負責主持大局，有個係「敵方」陣型，有個就仲係超齡青少年心態，各各角有棱角，但竟然無好好發掘呢個家庭嘅趣味性。然後最後去解決佢地之間嘅矛盾，就係只靠合力打大佬嘅最終高潮戲時發展出「親情」。唔係唔得，但明明有一個咁多背景嘅家庭，下下都係點出咗少少矛盾就算，好鬼懶。做足嘅話，起碼都應該加返場係講佢地未和解嘅時候，做一次失敗嘅任務，寫多少少呢個家庭嘅特色，畀多啲挫敗感佢地啦。最後，套戲要靠（唔吸引嘅）動作場面作賣點，而非用呢個騎呢家庭塑造任何令人深刻嘅印象，就係成個創作組捨難取易嘅地方，成就咗呢套戲嘅平庸。

---